「妳成日叫我睇《春嬌與志明》，但其實妳有無諗過，我先係春嬌，而妳係志明呢？」
灰色既天空，灰色既海水，無人既沙灘。除左不停拍岸既白泡，就只有偶然吹過既寒風，陪住著我一個人散步。
《當我想起你》：
「再記起一些古老的心事
再記起心中一串開心日子
曾在那似已遠遠的以前
共你差不多天天都相見
曾話過那天起 你已屬我 永不變」
自從同妳分手之後，已經好耐久無黎到呢個海灘。上一次黎，已經係成年前。
初時妳會笑住叫我睇《春嬌與志明》，後來又有啲惱咁催我睇。我只能夠「唔唔」咁應妳，都唔知點同妳講好。
春嬌：「一個女人過咗35歲，就係想穩定落嚟！」
我知，我亦都明妳叫我睇電影既意思係想催我結婚。女人有壓力，唔通男人無咩？
我老媽子成日煩我，係我面前攞啲人地送既細路仔衫摺黎摺去，話親戚送既，又話「差唔多時候架啦！我再老啲，就幫唔到你湊架啦！」
身邊班朋友成日攞佢地個仔啲相出黎，又講話個仔又幾叻幾乖。有時係街見到人地一家幾口，開開心心咁，拖住手，三人行。其實我個心都好酸架！
春嬌：
「張志明，其實我真係好鍾意你，
同你一齊真係好開心。
其實我好簡單，想做返個女人仔，
發生咩事，都會有一個男人企出來保護我，
我真係好需要，好需要安全感，
我唔係想要一個長唔大既男仔。」
妳知道我一直都好鐘意細路，想有小朋友。所以我若果拍拖，就會諗結婚；諗結婚，就會諗埋點生小朋友。但係生細路，同拍拖、結婚好唔同。
拍拖係兩個人既事，結婚都可以勉強唔理其他人，當係自己既事。所以我可以寵溺妳、遷就妳，只要我地兩個人之間搞得掂就得。
但生小朋友，一定會涉及第三個人、另一個生命，影響小朋友既一生。咁就一定要好好諗清楚，計劃下。健康、經濟、住邊、點樣湊、點分工、雙方父母幫唔幫手、請唔請工人，好多野都要好好計劃。
不過，我地好似從來都唔能夠好好傾到。由點結婚、點儲錢都未傾掂。妳只係叫我努力儲錢，但平時兩個人一齊開支咁多，又點儲呢？
春嬌經歷過父母分開，令到佢變得孤獨、敏感、缺乏安全感。其實我同春嬌咪又一樣。曾經捱過、凍過，令我好想有一個溫暖安穩既家。既然之前細個無，咁大個左，咪由我親自建立番囉！
但係我同春嬌一樣都敏感，更加怕孤獨，更需要安全感。外面幾大風、幾大雨，可以由我黎擋。我可以將我所有既寵愛俾哂妳。不過當我辛苦左一日，返到屋企，我怕妳會同我講：「玩夠，唔玩囉！」或者「未玩夠，去玩囉！」
春嬌：
「我係好鍾意你呀，咁又點啫！唔work呀嘛！」
一齊左咁多年。我既生命每一刻都已經有妳既痕跡。
早上訓醒會諗起妳，諗起妳會同妳話要養既烏龜打招呼、講早晨。
返工迫地鐵，會諗起點樣一邊擋住其他人，一邊攬住妳；上扶手電梯，妳會企低一格，將個頭挨住我心口/肚腩，瞌埋眼訓陣，妳話咁樣好舒服。
放工經過香港站，會諗起之前會等埋妳，然後再一齊去搵野食。食完拖住手行下街，去下寵物店同啲兔仔玩下。
返屋企一個人，會諗起之前會一齊沖完涼，再幫妳梳頭，等妳訓係我大髀，一邊等頭髮乾，一邊氹妳訓教。
成個屋企，屋企周圍，去到邊，都會同妳一齊既記憶。有時岩岩訓醒，我仲會以為身邊仲有妳。之前我一個人去日本旅行個陣，仲會下意識咁習慣向後望一下，然後我就醒起：「啊！原來我得番一個人。」
不過一段時間開心，唔代表可以行到最後。鐘意又點？唔work呀嘛！
當春嬌同志明去台灣旅行，咁岩遇上地震。志明一直叫春嬌去佢度，匿係枱底先安全。但春嬌太過驚，只係識捉實厠所門柄。志明又叫又氹又拉，都無用，志明最後惟有自己匿係枱低。直到地震停左，志明就衝過去安慰春嬌。但事後春嬌就怪志明：「頭先地震個陣，點解你匿喺枱下面唔理我呀？」
每次我或明示、或暗示，將我地既問題挑出黎講，但妳都會發脾氣。結果我都唔敢繼續講落去，我驚如果我捉住妳，將啲野講清楚，妳會發好大脾氣，然後我地就會分手。我唔捨得，又唔敢講，惟有拖。結果呢？當然係最唔好既結果。
我就好似志明咁，氹完拉完妳都唔郁，惟有自己走開，但又唔捨得掉低妳。就算之後氹番春嬌，但問題都無解決過。
我有啲後悔，我係咪應該早啲講？就算令到當時就分手，會唔會比而家個結果更好呢？
如果時間可以倒流，如果我可以返到去地震個一刻。我會同攬住門柄既春嬌講：
「妳想做女人仔，想我保護妳、照顧妳，但有事個陣，妳信個門柄仲多過我；妳係應該攬住我，而唔係攬住度門。不過我係唔會忍心，自己匿埋係枱低，但係咁近距離望住妳咁驚、咁無助。」
就算無張枱，我都會走過去，攞其他野，攞個喼、攞張櫈，總之幫佢擋住先。
然後我會講：「我想，想妳相信我，妳會放開另一隻手，用雙手攬住我，攬實我。」
男女之間係有好多唔同，而兩個人獨立既人，更無可能完全同步。可能今日係佢幼稚啲，聽日係自己任性啲。不過，如果雙方願意尊重對方，唔好發脾氣，或者至少發完脾氣，冷靜左，都會認真諗下，肯攞出勇氣、誠意同耐心去傾，係對方位置去諗、去感受，一齊去面對問題，一齊去克服。我估咁先至係人生伴侶既意義。
相敬如賓，舉案齊眉
從前覺得「相敬如賓，舉案齊眉」好老土，但而家發覺，兩個人既感情，能夠唔好當對方既愛係老奉，始終尊重對方係獨立既人，珍惜所有，係好難！好難！
志明與春嬌，咁就十年啦！唔知佢地兩個而家點呢？希望佢地結左婚之後都能夠開開心心。
從前沙灘上既一對腳印，被浪花沖過後，只剩番一個人獨自徘徊。
逝者如斯，祝君安好！
「過去的經已不會再出現
遠去的一切只會更加遙遠妳
明白到各有各的去路 但我心中始終感到
能共你愛過 暖暖的令我自豪
曾在我心 如此深深愛戀中 遺下憶記在腦中
從當天起 永都不可忘記
當我想～ 想起你 仍像昨天一般深愛你」
後記：
志明最後話：
「原來一個男人唔係需要一塊滑板或者一個達利
而係需要一個我鍾意
我想好好照顧佢
同佢一齊好好過日子既女人」
好啦！我都需要，不過我仲搵緊。
#志明 ＃春嬌 ＃中女 ＃催婚 #分手 ＃港女 ＃尊重 #幸福 #愛情 #藝文 #人際 #話題 #精選 #女生 #談情 #男女 #影視 ＃港產片 ＃伴侶
---
這是我的網誌：《仰子》#愛情 #文藝 #時事評論 #攝影
https://yangzi0827.blogspot.com/
這是我的面書專頁：《仰子》
https://www.facebook.com/仰子-264327233997078/
喜歡討論藝文話題的朋友可以來找我啊！
留言
張貼留言